...

Federasaun Futebol de Timor-Leste (FFTL) neebe responsabiliza tomak ba atividade futebol iha rai nee bele hateten hatudu ona progressu no valor pozitivu neebe murak no morin ba rai nee. Progressu hirak nee mak ita bele hare ho involvimentu ekipa nasional hahu husi idade U-12 too selesaun nasional ou senior.

Prestasaun furak neebe ikus Timor-Leste hetan mak ita nia ekipa selesaun U-19 sai terseiru lugar iha AFF Championship U-19 iha Surabaya, Jawa Timur-Indonesia.

Iha selesaun U-23, maski la pasa ba semifinais, ekipa selesaun Timor-Leste konsege hetan poin 4 no finish iha kuartu lugar grup B. Iha jogu nee, Timor-Leste mos konsege jogu 0-0 ho Indonesia, neebe iha SEA Games 2011 nudar runner up kampionatu nian.

Hare ba prestasaun nee, V Governu Konstitusional neebe lidera husi Pimeru Ministru Kay Rala Xanana Gusmão tau atensaun especial ba modalidade futebol neebe tinan-tinan sempre toka hino nasional Patria-Patria iha kualker jogu internasional katak presiza duni tau orsamentu ba dezemvolvimentu futebol neebe lidera husi Prezidenti Federasaun Futebol Timor-Leste, Francisco Kalbuadi Lay. Hafoin tetu ho partisipasaun no prestasaun furak Timor-Leste nian iha iventu internasional, PM Xanana laiha duvida tan atu fo subsidiu ou aloka orsamentu ba FFTL atu dezemvolve diak liu tan futebol iha rai laran atu nunee bele hamosu barak tan jogador neebe diak no kualidade. Seriedade PM Xanana nee bele hare husi alokasaun osan hamutuk miliaun dolares amerikanu ida (US$ 1 miliaun) iha Orsamentu Jeral Estadu (OJE) tinan 2014 neebe hetan apovasaun husi reprezentante povu iha Parlamentu Nasional.
Husi esplikasaun Sekretariu Estadu Joventude no Desportu (SEJD), Miguel Manetelo iha media imprimi esplika katak orsamentu neebe aloka ba FFTL liu husi SEJD nee atu aloka ba kriasaun iventu nasional no apoiu ba partisipasaun ekipa nasional iha jogu internasional.
Nunee mos membru Parlamentu Nasional, Osorio Florindo husi bankada opozisaun FRETILIN hare katak votasaun neebe nia parte ho membru PN hotu ba alokasaun osan miliaun ida ba FFTL importante duni atu dezemvolve futebol iha rai nee diak liu tan.
Desde FFTL Harii iha tinan 2002 ho lideransa Francisco Kalbuadi Lay atual Ministru Turizmu hetan applause barak husi komunidade futebol nasional, liliu internasional sira tamba, Francisco Kalbuadi Lay konsege lori progresu ba dezemvolve futebol iha nia rain.
Prestasaun furak iha nivel rejional AFF (ASEAN Football Federation) prova ida ba barometru Timor-Leste nian neebe dadauk nee sai ameasa ona ba nasaun membru AFF sira iha iventu internasional neebe Timor-Leste partisipa ba.
Susesu boot ida neebe FFTL liu his lideransa Francisco Kalbadi Lay konsege hatudu mak lori Timor-Leste sai uma nain hotu ba jogu iventu internasional nivel ASEAN ho naran FAM-Frenz ASEAN U-15 Championship, neebe partisipa husi nasaun Thailandia, Malaysia, Vietnam, Kambodia no Singapura. Iventu neebe organiza husi FFTL nee konsege anima povu Timor-Leste rihun ba rihun hodi halibur hamutuk iha Estadiu Municipal Dili ho objektivu hare no fo apoiu joga neebe ekipa selesaun nasional U-15 jogu ba.
Paisajem neebe nunka akontese iha rai Timor-Leste, maibe FFTL komesa hatudu ona nia kualidade no kapasidade hodi dezemvolve futebol liu husi realiza jogu internasional iha rai doben Timor-Leste nee.
“Hau hanoin nudar Timoroan, ita tenki orgullu ba atividade internasional neebe FFTL komesa halo ona iha ita nia rai, maski durante nee ita hare sei iha buat kiik barak neebe presiza hadia tan. Ita mos tenki fo parabens ba FFTL nia servisu makas nee, nunee mos ba prestasaun seluk iha nivel internasional neebe FFTL hatudu ona,” hateten Carlos da Costa, supporter Timor-Leste ba STL, Domingu (01/07), iha Bairo-Pite, Dili.
Desde harii iha tinan 2000, Timor-Leste maski iha nivel internasional sedauk bele fo “Piala” ruma, maibe liu husi FFTL hatudu prestasaun barak kona ba involvimentu futebol Timoroan sira iha mundu interansional.
Prestasaun nee bele hare husi servisu kolektivu no professional neebe lideransa FFTL nian halo hahu husi nia prezidenti, vise prezidenti sira hanesan Filomeno Fernandes, Osorio Florindo, Aleixo Cobra, no Francisco Jeronimo, membru ezekutivu hanesan Nelio Isaac Sarmento, Terezinha Viegas, Germano da Costa, Faustinho Godinho, no sel-seluk tan. Inklui Sekretariu jeral Amandio Sarmento, tekniku professional sira Orlando Mendes, arbritrajem, treinador, jogador, familia jogador sira no povu rai nee rasik neebe kontinua fo konfiansa atu FFTL bele halo dezemvolvimentu futebol nian iha rai nee.
“FFTL iha integridade bo’ot hodi dezemvolve futebol iha rai nee, nudar ema neebe gosta futebol, hau la duvida ho se-se deit mak tuur iha estrutura FFTL, maibe ho prestasaun ikus-ikus nee, iventu internasional neebe halao iha ita nia rai, FFTL bele lori duni progressu ba dezemvolvimentu futebol iha rai nee,” komentariu Arlindo Silva, nudar foin sa’e ida.
Arlindo husu atu FFTL kontinua tau matan ba jogador sira no fo tan prestasaun-prestasaun diak ba Timor-Leste iha futuru.
Prestasaun murak neebe FFTL hatudu mak, konsege lori Timor-Leste sai membru FIFA, AFC no AFF. FFTL mos konsege hadia peringkat dunia FIFA nasaun nee nian neebe uluk hahu iha peringkat 202, dadauk nee tuur iha numeru 185 ou Timor-Leste manan ou lidera nasaun 22 neebe iha nia okos husi total nasaun 209 FIFA nian.
Hare ba prestasaun jogador iha kampu nian, hanesan ikus nian selesaun nasional U-23 Timor-Leste konsege tuur iha pozisaun numeru 3 SEA Games Jakarta 2011. Iha jogu nee, Timor-Leste konsege manan Filipina 2-1 neebe nia dezemvolvimentu futebol avansadu liu Timor-Leste no tuur iha pozisaun (peringkat FIFA) numeru 144 mundu nian. Alende nee Timor-Leste mos manan Brunei 2-1. No lakon deit ho golu 1 (1-0) husi Vietnam neebe nia peringkat FIFA iha numeru 133 ou peringkat nee Vietnam tuur iha numeru ida rejiaun ASEAN nian. (Pozisaun peringkat dunia FIFA husi AFF,  Vietnam 133, Thailand 142, Filipina 144, Myanmar 155, Malaysia 159, Singapore 165, Laos 168, Indonesia 170, Brunei no Timor-Leste 185, Kamboja 189)
Maski la liu, iha kualifikasaun AFF Championship 2012, Timor-Leste konsege mana Kamboja 5-1 no Laos 2-0. Ho manan nee, Timor-Leste tuur iha pozisaun numeru 4 ou lidera Brunei no Kambodia neebe iha okos.
Alende nee, FFTL mos konsege lori ekipa selesaun U-16 hetan terseiru lugar iha iventu AFF U-16 Championship Solo 2010, no Timor-Leste mos hakerek istoria furak neebe hetan kongratulasaun husi FIFA no AFC tamba bele kompete iha putaran final AFC U-16 Championship 2011 iha Ubzekistan.
No ikus ekipa selesaun U-14 Timor-Leste sai kampiaun iha kualifikasaun AFC U-14 Championship 2013. Iha iventu nee, karik Timor-Leste tama to semi-finais, nasaun nee sei partisipa iha Kopa Mundial U-16 nian.    
FFTL iha Integridade Bo’ot Dezemvolve Futebol Timor-Leste
Progressu no dezemvolvimentu futebol iha rai nee mos la ses husi lideransa Francisco Kalbuadi Lay nudar Prezidenti FFTL. Ho kapasidade no matenek lobby neebe Maun Chiko (Francisco Kalbuadi Lay, red) halo Prezidenti FIFA, Joseph S. Blatter la duvida atu ajuda dezemvolve futebol nasaun foun nee. Hare ba vizaun no vontade Maun Chiko nian ba dezemvolvimentu futebol iha Timor-Leste mak halo FIFA mos harii edifisu permanenti ida ba FFTL neebe iksu hanaran FFTL House neebe dezenu edifisiu nee sempre lideransa membru nasaun FIFA, li-liu iha Asia no ASEAN bolu FFTL House hanesan Timor-Leste White House. La hotu iha nee deit, FIFA mos fakar tan osan hodi harii Sentru Treinamentu neebe ikus hanaran Xanana Sport Centre hodi konsetra jogador sira iha fatin ida no kampu treinu ba jogador selesaun sira ho nivel standar internasional.
Zetu haraik an, nunka gava an no la gosta koalia barak maibe hakarak hatudu asaun neebe pessoal Maun Chiko iha nee mak loke hanoin lideransa nasional no internasional sira tantu iha politiku, governu no desportu la hanoin rua atu tau fiar no konfiansa ba nia.
Francisco Kalbuadi Lay, tinan barak hatoman aan iha mundu organizasaun, hanesan organizasaun politika,  juventude, kultura, no organizasaun desportu.   
Internasionalmente iha mundu desportu, espesialmente futebol, naran Maun Chiko konesidu teb-tebes tamba nia involvimentu no kontribuisaun bo’ot teb-tebes iha nivel internasional, kontinental no rejiaun.,
Ida mak Federasaun Mundial Futebol (FIFA), ho kapasidade no matenek neebe Francisco Kalbuadi Lay iha, Prezidenti FIFA Joseph Sepp Blatter laiha duvida atu fo kargu ba nia nudar membru ezekutivu iha Komite Assosiasaun nian. porizemplu Maun Chiko konsege hetan fiar reprezenta husi Prezidenti FIFA reprezenta FIFA no konsege resolve problema konflitu PSSI iha Indonesia no BAFA, Brunei.
Nunee mos iha Asian Football Confederations (AFC), naran Francisco Kalbuadi Lay too agora mos ema respeita nia hodi halo lideransa numeru ida iha AFC fo kargu diak ba nia nudar membru komite finansia nian.  
Kargu nudar Senior Vice Prezidenti ASEAN Football Federation (AFF) neebe Francisco Kalbuadi Lay asumi, hatudu katak, maski politikamente Timor-Leste nia adezasaun ba ASEAN sedauk bele simu, maibe AFF iha 10 April 2011 liu husi Kongressu AFF nian deside no eleitu Francisco Kalbuadi Lay hodi fo fiar no tau konfiansa masimu ba Timoroan husi Aileu nee lidera  AFF hamutuk ho Prezidenti AFF, His Royal Highness (liurai) Sultan Haji Ahmad Shah husi Reinu Malaysia hodi dezemvolve futebol iha rejiaun Azia Sudestiku nian.
Maski eleitu nudar prezidenti foun AFF ba periodu 2011-2015, ho nia pozisaun nudar Liurai iha Reinu Malaysia, Sultan Haji Ahmad Shah, liurai nee ho konfiansa entrega servisu ezekutivu lor-loron AFF nian ba Francisco Kalbuadi Lay.
“Tuir protokulu, hanesan liurai hau labale halao hau nia servisu lor-loron iha AFF, ba ida nee hau entrega ba Francisco nudar senior vise prezidenti AFF hodi halao servisu (ezekutivu) lor-loron nian,” dehan Sultan Haji Ahmad Shah hafoin eleitu iha kongressu ba dala 18 AFF nian neebe halao iha Bangkok, Tailandia tinan rua kotuk liu ba.
Matenek no kapasidade nebe nia iha, Francisco Kalbuadi Lay mos hetan fiar internasionalmente nudar assessor ba dezemvolvimentu desportu iha Asia. Fiar nee mai direitamente husi Liurai Sheik Ahmad Al-Fahad Al Sabah nebe asumi kargu Prezidenti Olimpiku Asia (OCA).
La se’es mos husi nia servisu nudar Ministru Turismu, foin fulan hirak deit nia laran, liu husi iventu internasional karavana, grupu Caravana Timor-Leste neebe responsabiliza husi Minesteriu Turismu sai juara 2 iha iventu Bali Festival International Caravana fulan kotuk liu ba.
Nudar minesteriu foun, maski buat barak neebe minesteriu nee sedauk bele implementa, espera iha tinan Orsamentu Jeral Estadu 2014, Minesteriu Turismu iha lideransa Maun Chiko bele mos fo prestasaun diak ba area turismu nian hanesan prestasaun neebe nia hatudu ona iha mundu desportu, li-liu futebol.
Maun Chiko hateten, servisu neebe durante nee nia halo la ses husi Maromak nia tulun no orientasaun husi nain ulun sira hanesan Prezidenti Republika Taur Matan Ruak, Primeiru Ministru Kay Rala Xanana Gusmão, eis Primeiru Ministru Mari Alkatiri, Maun Lu-Olo, veteranus sira, inklui povu iha rai nee.